|
自細漢到大漢,我毋驚罵不驚拍，上驚阿母仔毋肯煮予阮食。
伊若歡喜，煮的是山珍海味，若是無歡喜，三頓是豆乾佮鹹魚,
我看著就目屎翱翱輾。 所以攏毋敢惹伊來受氣。
若講著阮阿母，伊的手藝是通人知，伊咧煮食是蓋厲害。
毋管是糋的煎的炒的烘的，抑是煮的燖的滷的炊的，攏考伊袂倒，好比是【阿基師】
尤其是伊的覆菜炕滷肉，白飯是扒到幾若碗，三杯雞炒薟椒仔，喙瀾水是滴袂煞，猶有猶有，講著滷豬腳，伊是第一名。 恁毋通用彼種眼神共我看，我知影恁咧想啥！恁佇咧想講… 我的手藝是毋是有種著阮母仔…
哈哈…共恁講：我會曉煮麵，嘛會曉烘番薯，就是無愛提煎匙，因為自從細漢炒蛋炒到臭火焦又閣牢鼎，我就看破兼咒誓，袂閣學煮食。
阮阿母的手藝內面，上厲害的就是做【甜粿】。甜粿一出手，絕對無對手。 有一工就問阮阿母：「阿母，咧欲過年囉，請問當時才欲做甜粿？」
母：「做甜粿真厚工，愛三工，閣愛搬重，我身體䆀，堪袂去，無愛做矣。」 天公伯仔………這時的我就親像予雷公敲著，失去了【三魂七魄】
就親像豬寮死豬母遮爾仔驚惶，雞寮著雞災遮爾仔心痛。 恁莫閣當做我毋知恁咧想啥，恁是毋是咧想講：聽你咧歕雞胿，雞胿歕袂破，阿同你愛臭彈。
尤其是桂花甜粿，鼻著是心花開，看著是喙瀾水
khok-khok
滴,食著是𩚨嗲嗲，袂記得體重愛撙節一塊閣一塊.
人講：過年無甜粿,就好比-五日節無肉粽，中秋無月餅.失去了過節的感覺。 雖罔，甜粿有塊買，只不過，阿母的滋味絕對是買無。這時我看著手錶，思考三秒鐘，決定隨來拜師學藝。
一洗米,二浸水,三愛研米,四硩水,五輾粉煮粿粞,六撋𩚨摻糖摻桂花,七提籠床準備炊.
炊熟矣，挖一塊來食，俺娘喂…好食甲會觸舌，這就是【懷念的滋味】。
這時我想：既然上困難的【甜粿】我攏會曉。按呢嘛來學阿母的其它料理。 但是….
學煮食無輕鬆，學著一項是囥三項。 阿基師教著我，嘛會氣甲倒佇塗跤。
蔥仔蒜仔分袂清，欲包水餃頭咧腫。
菜刀磨甲若柴刀，提刀刣魚就煩惱。
有時攏咧想。
家己一點仔天份攏無，放棄是我唯一的出路。
煞因為阿母的一句話，就按呢改變我的路途。 伊講:【查某囡仔佮意會曉煮食的查埔人】 現此時的我【心中的熱情】像【大火ほ款】著起來，
就好比佇烏暗中看到光明燈。規个目睭攏擘金。
隔轉工。頭殼清醒閣通明。毋免阿母來掛心。
就算聽無，學袂曉。嘛袂感覺失敗就想欲來【放棄】。 因為只要想著【查某囡仔佮意會曉煮食的查埔人】
我就【暗爽在心內】。好比著獎無人知。
就按呢學了兩冬。 不管是糋甜粿、煎牛排、炒米粉、烘魷魚，抑是煮雞酒、燖排骨、滷苦瓜、炊鱸魚
對我來說就好比，桌頂拈柑，輕輕鬆鬆。
阿母的功夫學無十成，嘛有八成，這馬人人攏叫我【阿同師】。 在座有食過我料理的，攏攑手，恁家己摸心肝。我是毋是足𠢕煮--ê。你看，你看，遮的攏我的柱仔跤。
別人愛學咧三年四個月，我是學兩冬就出師。 食飯洗衣攏佇咧想煮食，三頓煮飯炒菜攏我來。
兩年就出師上大的原因就是 【目標確定】
目標若確定，就會愈做愈有信心。 目標若確定，拄著困難就會想欲如何來改進、來完成。
主持人
|