「阿爸！阿爸！七早八早你妝甲遮爾仔飄撇，是欲去佗位𨑨迌?」「戇囡仔！今仔日是正月初一，咱欲來廟裡拜拜！」過年彼工的透早，阿爸照鏡當咧打扮，抹面油、梳haih-kak-lah頭、結neh-kut-taih、穿seh-bih-looh，看著是歡頭喜面，誠好鬥陣。去到廟裡，「佛祖啊！你著保庇厝內囡仔大細，會當平安、勇健、大趁錢。」阮老爸顧咧共佛祖下願，我走去金爐遐燒金、放炮仔，這是逐冬過年的時，阿爸攏會𤆬我去做的代誌。前無偌久，新正年頭，我閣再去廟裡拜拜，阮阿爸這回無去，因為伊已經無佇咧矣。我誠數念我的阿爸，數念伊拍拚扞家、佮注重人品的堅持。

阮老爸少年的時，是咧做賣布的小生理，為著欲晟養五个囡仔，逐工天拄拍殕仔光就出門，褪赤跤，用扁擔擔成百斤的布料，沿路行，沿路喝賣：「來喔！來買布喔！」扁擔雙頭硩重，㽎咧㽎咧，人嘛綴咧搟咧搟咧，行袂穩，啊汗那流。有一回阿水伯仔兇兇狂狂毋知咧趕啥，阮老爸共喝來講：「阿水仔！恁新婦拄共你生一个查埔孫，誠福氣呢！我遮拄進一條偝巾，敆大紅花，誠喜氣，若來偝恁孫，穩當是𠢕大漢閣好--育--飼！」阿水伯聽甲是耳仔覆覆覆，錢撏咧擲予阮老爸，偝巾提咧，喙笑目笑就走矣。毋過，聽講阿水伯仔轉去到厝，予阿水姆仔罵甲臭頭雞仔：「你這个膨肚短命的！叫你去買一罐仔牛--奶--粉通泡予咱孫的啉，你煞買偝--巾轉來，暗頓這條偝巾你才提去哺啦！」阮老爸𠢕講話，外交閣好，生理攏做有成的較濟，伊毋驚艱苦，這就是伊拍拚扞家的精神。

咱在座的各位，予我借問一下，俗語講：痟貪是會按怎？著！痟貪會軁雞籠（lam）。這句話我自做囡仔的時，阮老爸就有教我矣，毋過我付出悽慘的代價。國校仔二年的時，阮同窗的-阿榮仔招我去海邊仔𨑨迌，雙人跳落去一台塑膠棑仔頂懸，塑膠棑仔是塑膠管縛做伙的細隻漁船。阿榮仔雄雄𢯾一粒石頭出來敲塑膠管，敲做一杮（phuè）仔一杮仔，我徛佇船仔邊咧看頭，若有人來就愛喝聲，通好旋，過無偌久，塑膠杮仔貯甲規布袋矣，兩个人提去賣歹銅舊錫，賣五十箍，提去買冰、食四秀仔，有夠歡喜，袂輸猴山仔去食著弓蕉仝款。無疑悟隔轉工，塑膠棑仔的主人受氣受掇(tua̍h)來投阮老爸，阮老爸氣甲，共我的手骨掠咧，這枝咧量布的尺攑咧就共我就捽［落去］，沿路行沿路捽，我那哀：「我後改毋敢矣！我後改毋敢矣！」。去到主人家（ka），我雙跤跪落，會失禮，老爸目屎那流：「你食著好膽藥仔，人牽毋行，鬼牽溜溜行，你細漢偷挽匏，大漢就會偷牽牛。」老爸重的是人品，自彼改了後到今，我毋敢閣貪人半項。

我是咧食政府的頭路，負責發漁船仔掠魚的執照，有相當的權利，袂少人愛共我扶扶挺挺，有一回船公司的頭家敲電話予我講：「喂(Eh)！蔡sáng, 年咧(tih)欲到矣，我有攢一箱烏甕串的sah-sih-mih佮小可仔紅，欲共你說多謝，勞煩你才斡來阮公司提唅（Hannh）！」有sah-sih-mih閣有紅包…，我當咧躊躇的時，聽著耳甕仔邊有人咧唸講：「袂使貪、袂使貪、痟貪是會軁雞籠！」當時啊是阮老爸講過的話，袂輸咧共我提醒，細漢的時予阮老爸摃甲悽慘落魄的代誌，我才回魂轉來，毋敢去提。

阮老爸傳承予我的是拍拚扞家佮注重人品的精神，我欲共傳落去。以往過年，攏是阮老爸𤆬我去廟裡拜拜，這馬，換我𤆬我的後生去，我求講：「佛祖啊！你著保庇厝內囡仔大細，會當平安、勇健、大趁錢。」我的囡仔佇金爐邊仔咧燒金、放炮仔，就親像當年，我倚佇阮老爸的身軀邊仝款。「乖囝的，恁阿公伊當年賣布，千辛萬苦，是為著欲顧規家伙仔的腹肚，教我愛拍拚扞家，這是頭一層。第二，阿公注重人品，教我凡事「袂使貪」，愛靠家己趁，才會成功！我這馬才有才調做一个處長級的主管。」阮老爸傳承予我的精神，是一塊上gioh-toh的布，我欲用伊留予我的這枝尺來量，共車做一領衫，一領四正四正人格的衫，永遠傳予囝囝孫孫。

主持人！