俗語在講：查某人菜籽命，捻頭嘛飼會活，查某囡仔飼大漢是別人ㄟ，讀啥物冊？不免啦！我ㄟ阿母就按捏一天學校都不曾進去過。

但不知恁有想過嘸，高知識份子，冊要讀甲什麼程度？是高中、大學、還是研究所？阮阿母雖然不曾讀過冊，但在我的心目中伊祙比任何一個人擱卡差，甚至可以說是博士博，因為伊用生活態度教阮識真濟代誌。

阮阿母小漢時，因為「以阿」卡早過往，伊擱是大漢查某仔，必須擔起責任，伊定定在說，那當時逐工天袜光就要去蹲在古井邊洗歸口灶的衫，艱苦捾不贏、餵蚊子或者是寒天洗衫凍甲一雙手紅吱吱嘛祙使哭，不然就祙付天光跟房頭內其他人去田裡做事，會被叔嬸因修理，伊祙使被看沒，說伊就是沒老母教示才不識代誌，所以從小漢就很拼，目屎含咧，牙齒根咬咧，毋認輸！家裡其他4個兄弟和小妹都有讀過冊，只有她連學校門都不曾行偎過，因為伊知影，沒阿母惜ㄟ囝仔尚歹命，伊要兼著當媽媽~~~，雖然小漢時被修理甲有卡累，聽說伊二嬸往生前擱會因為常常夢到阮阿嬤來怪伊苦毒這陣囝仔，有來會失禮說後悔，但是到現在她只是淡薄啊怨自己沒那個命並沒對因來揀恨，顛倒逐回載伊返去外家，伊一定連三叔公及屘叔公都準備一份伴手，因為伊講因總是世大，伊時时是大家攏散，散尬鬼欲抓去，那有法度顧著別人的子，並不是故意要欺負咱這房，伊就是按捏教阮認真做代誌還擱有尊重世大。

人講嫁雞隨雞飛，嫁狗隨狗走，後來伊嫁乎阮爸，搬來外省ㄟ眷村，並那路頭路尾佇著厝邊隔壁，外省阿腔，根本是鴨仔聽雷聽攏嘸，但伊猶原攏會相借問，不管是吃飽祙，天寒啊要穿乎卡燒ㄟ，或者是簡單笑一下點一下頭，反正啊伊總是祙假沒看到頭仔犁犁直接行過去，因為伊講咱雖然不識字，不能乎人講咱不識禮貌，不識字已經是事實，但不識禮貌就沒彩累做人，而且自我有印象以來，阿母雖然是人人好，但罕得過街，因為伊講人甲人逗陣佇好就好，常去過家是給人添麻煩，啊恁阿爸為著這口灶在外口賺吃沒住在厝，咱兜嘛不適合乎別人來，尤其是查埔人，伊講看過足濟平常時好甲袜輸褲帶結相連的，卻常常攏為著小誇代誌就撕破面，相打不讓手、相罵沒好話，或者是講人尻倉後話乎人連解釋的機會攏沒，伊講人總是按捏，最親的人一支嘴害人嘛最吃力，所以做人講話一定要有斬截，行為要做直正，伊就是按那教阮識做人的禮貌還擱有言多必失。

因為阮兜住累卡庄腳，去外口吃不方便，從以前阿母三頓攏要自己煮，但伊永遠是全家伙最晚偎過來桌邊呷飯的人，總要大家先吃，伊先甲灶腳洗好款好水果切好才偎過來，到現在阮們要甲改，嘛改祙過來；厝裡的人那要出門，不管是以前阿爸要出去吃頭路，或者是阮今嘛休睏時阿轉去呷飽要離開啊，阿母一定站在門口送，就算透風落雨，伊嘛猶原站在那，因為伊認為這攏是做查某人ㄟ本份，幾落十年來伊就是按捏教阮做人要認份。

這陣子，伊那在電視頂看一些人大小項代誌都累怪別人，怨天怨地、怨揈匣怨飯笠，伊就會怨嘆~唉，社會哪會變這樣？然後甲阮講：卡早只要庄頭有熱鬧、有人客要來，提早幾落工庄內的人就會去甲路邊草啊剷清企，當天擱相招去煮紅圓，米粉芋請人客，雖然那當時生活沒今嘛舒適，不過誠意呷水甜，大家是真相挺，那有像現在日子好過啊卻不知互相尊重，逐工都吵吵鬧鬧顛倒萬項代誌攏做不成，擱乎人看袜起，伊常常在講：是啦，沒定你是真敖，但是別人嘛無一定比你卡憨慢，尊重兩字那不識，讀卡多冊也無價值，伊就是按捏教阮對人要加一分尊重。

這就是阮阿母，一個不曾讀過一天冊的台灣查某人，甘那用伊ㄟ作人來教阮就算是冊讀嘸，只要知影態度好，認真，認份、識禮貌、再加上一分ㄟ尊重別人，按捏就有夠啊！這甘不是正港查某人ㄟ智慧累？

主持人。