相信在座各位朋友，應該會同意1952年出世的我 看起來並無真老，其實我佇咧58歲的時陣，就已經知影我是一個老太太。因為有一工 一個58歲的査某人 開車違規不服取締，擱佮交通警察大細聲 吵佮登上電視媒體，新聞走馬燈出現：一位58歲老嫗(oo5)如何如何（嫗是女邊 湊一字區）。當下 我才知影 原來普世眼光中，當年58歲的我 已經是一位老太太。自彼刻開始 我心內暗暗仔起變化，有一種為了 維護老人尊嚴的戰鬥力，漸漸~累積~累積~累積到最後，好親像我體內藏一桶汽油，只等一支番仔火!

過了半年，咱國際演講會的英語會 有一位會長摕(tshua7)團去阮上班的機關-台中監獄 做宣傳，會中一位外國牧師佮一位台灣老師，發心每禮拜欲去阮機關指導英語。啊 若欲學習 就愛成立社團。這個社團 從30個 25個 15個 愈來愈少，毋是老師袂曉教，是學生啊講怹(in)真無閒。人 老師ㄧ逝工來到這，上課學生若是無幾個，實在是足無禮貌!所以我從來毋捌無到位，而且誠認真。

經過一年偌，牧師欲轉去米國，老師嘛欲去六龜做義工，按呢欲按怎？這個社團己經成立啊!當初我是發起人兼社長，這嘛只好簡單凖備一寡敎材，利用中晝時仔，死拖硬扭十幾個，作伙佇彼凊采抐(la7)，勉強維持著這個社團的存在佮面子。憑良心講：程度若好的 攏走去睏中晝；肯留落來的 英語攏離離落落，我嘛是差不多爾爾(nia5)，雖然 賰(tshun)一寡烏合之眾，但是長官毋知影 叫是阮真爻(gau5)。有一工 典獄長佮我叫去伊辦公室 伊講法務部有來文，後個月南非某某國的司法部長摕團來咱機關做參訪。你~是本監英語社長，請妳負責英文簡報、環境介紹、現場翻譯，我雄雄驚著 啥麼攏袂曉考慮就講：是是是。答應了後 已經無法度反悔啊!彼的社員看到這個情形 攏走佮奔跫(phun3-khing)去 閃佮離離離。佇無兵無將 無支援的情形之下。逼佮我彼種為著 維護老人尊嚴的戰鬥力，佇這個坎站(kham2-tsam7)爆發了!

我心內想講：好~今仔日當作 朝中無爻人，恁少年做袂到的代誌，我老歲仔展予恁看。就按呢 我上網站査 專有名詞、翻譯資料、製作簡報~無暝無日。看電腦看佮目珠霧煞煞，目油管管流，背英文背佮摔頭摔耳，若因為三頓時間無夠 呷二頓，拼佮瘦一身軀肉~到這咧地步，我翻譯的內容已經無啥麼深度，簡單明瞭就好。啊~若是聼無咧？彼是恁兜的代誌。





參觀彼工到啊!南非來的貴賓 一陣人 大部分肉色 烏茹茹(lu)...有穿西裝的，嘛有身軀袚(phuah8)花仔布的。外交部佮法務部攏有派員隨同，陣頭看起來嘛很大。當下 我家己讚聲：加油!這是老人尊嚴的背水一戰!就按呢 真奇怪 隨著我大聲喝出歡迎詞，突然間 有一種死馬變做活馬的感覺~勇氣百倍。簡報的時陣，我的目珠直接看來賓，恁敢知影？佇我看著烏人白人攏一直頕(tam3)頭，哇~怹聽有啦，我講了有正確啦~我是歡喜佮 愈講愈大聲。

有了這擺的經驗，膽頭愈來愈大，嘛愈來愈有信心。後來 嘛捌接著大場面，比如「國際大學交換學生」，哇~一團若塊掛香咧!囡仔人話屎較濟貓毛 問東問西，我就身軀揹大聲公 沿路做放送，鬧熱佮親像咧迎媽祖。紲落去 擱會主持節目呢，不管犯人表演南管北管、國樂西樂、弄獅弄龍、七爺八爺、電音三太子...哩哩扣扣，我攏有辦法查資料、作翻譯、畫山畫水，啊~若是聽無？彼是恁兜的代誌。

規擺落來...名聲誠響，阿婆誠猛!所以我機關知影我欲退休的時陣，怹派一位國立大學外文系的少年職員 隨吾學習，伊擱叫我師傅呢。嘛因為按呢，改變了真濟人的看法，就是...毋好看輕老人的能力，機會是永遠留給有準備的人，無分老年抑是少年。

我~當年60歲的老嫗，因為敢接受挑戰，不但得到尊重佮人緣，所以家己爭取到記功的機會，兼當選模範公務人員的獎勵。人生在世，從囡仔、少年、中年、老年~每一段路程攏有無仝款的風景，攏有性命存在的意義佮價值。但是對我來講，無論是青春的少年期 抑是安穩的中年時，過去生活過程中的百般滋味，攏毋值得我佇60歲的時陣 所感覺的自信，所得到的光彩。

因為我知影~人生的路途雖然咧落階，時間親像水咧流 赫呢仔無情。變老的事實既然無法度改變，為什麼無愛好好利用累積的人生經驗，佮彼種「若無做過就袂赴」的覺悟，為自己創造人生「最後一頁」精彩的故事。若是會當抱著這種理念，佇這個階段的性命 伊的生存的價值佮意義，嘛有可能發揮咱一世人的最高點。

所以, 各位請恁一定愛相信~老歲仔人 若是有心為了維護尊嚴的戰鬥力，是會猛(me2)佮親像一桶汽油點到一枝番仔火，請恁大家毋免懷疑!