有一擺，阮阿爸心適興，帶阮去爬山。行啊行，阮阿爸雄雄停落來，問阮講：「恁看！頭前的樹仔有甚麼無仝？」阮看規半晡，攏感覺樹仔就是樹仔，逐欉嘛平青，平媠，哪有甚麼無仝。阮阿爸講：「恁敢無感覺中央彼欉香香仔的踉比人較懸？」阮斟酌一下看，赫！有影呢，彼欉香香仔的樹仔無啥枝葉，袂輸顧踉懸爾。阮阿爸共阮姊弟仔講：「恁要會記得！佇遐爾蓊的樹仔內面，若無拼勢踉懸，伊就無法度食著露水、烺著日頭，就無法度生存。」我知影，阮阿爸講彼欉樹仔，是在教阮佇困難的環境內面，要比別人較拼勢，認真,才有法度佇社會徛起。
　

阮阿爸是屘仔子,有一個文雅的名叫太陽,嘛有一個倯閣有力的外號--憨孻。
　

俗語講:屘仔子屘丟丟沒疼會夭壽,細漢逐个把伊惜命命,有個新婦,大漢欲做尪某,十幾歲時 ,兩人越看越無對檔,我看你殕殕,你看我霧霧。聽阮大姑講:『伊兩人親像門櫺板鬥不合,犀牛照角-見面就觸』。阮阿公把他們叫到面前說:『恁兩人沒相欠債,男婚女嫁雖在恁,做兄妹行』, 將小妹嫁出去,把阮阿母娶入門。古早人講:近近相瞪眼,遠遠刣雞角,阮阿爸加一個小妹,我加一個屘姑。
　

我的阿爸忠厚、老實、熱心。俗話說:千金買厝，萬金買厝邊,庄頭巷尾大家呵咾伊。無錢找憨孻, 做公工找憨孻,庄頭內,賺無吃,囝仔大陣,要註冊的人 ,阮阿爸絕對跑第一個。有人笑伊: 憨孻,實在有夠憨,救蟲毋通救人。阮阿爸笑笑講:誰較憨,猶毋知!
　

有一擺,看伊在吃豬腳麵線, 唉-今仔日,毋是生日, 毋是天公生, 嘛毋是初一十五,怎會吃豬腳麵線呢!阮阿爸說:『也都頂城那個憨呆騎機車跌落水溝,是我敲電話叫就護車送病院,這馬出院了,伊的序細買來予我吃平安』。伊共阮講:一個人有能力幫助人時,絕對毋通躊躇。
　

阮阿爸在弓蕉市食頭路(投影片第1張),臺灣省青果合作社,伊是評級員--選拔仔, 伊共師父學裝弓蕉籠。古早人講:滿山樹，毋是師父取無樑 ,經過師父牽教,沒藏步,認真學,三年四個月,出師!做一個選拔仔要有專業知識,目金,跤手快,袂當失角岔,弓蕉分級,內、外銷,價數是一丈差九尺,若失角岔,農民損失真濟。經過他選出的弓蕉不計其數,銷往日本。伊裝的每一籠弓蕉過磅時攏平重,台灣弓蕉特別香、特別甜,是香蕉王國,哪有一領沐著弓蕉奶的衫,彼是什麼人?好額人。

有一首民間俚語(放投影片第2張)
　

「日燒燒，中寮舍，割香蕉，換日票；月笑笑，中寮舍，找查某，來攬腰」。
　

 阮阿爸就是彼个阿舍,定定共朋友去一個所在,親像--台北的寶斗里,南投草屯的五板橋仔,各位彼是什麼所在? 聽眾回應--(茶店仔、酒家)對!
　

 阮阿爸三不五時,跟朋友蹔酒家,有一擺,酒量無好被灌醉了,朋友一個一個腳底抹油--溜了,阮阿爸被留佇酒家,第二工阮阿母提錢去放人,伊感覺足見笑,從此,一個人佇家坐踮椅頭啉愰頭,嘛無要你兄我弟-去花天酒地。伊講: 重情重義的朋友--關公劉備,專門設計害人--林投竹刺。恁目睭要擘予金 。
　

阮阿爸賺錢賺真濟,蓄田園蓄厝地, 人笑伊: 憨孻,實在有夠憨,紙頭無名,紙尾無字,攏無過戶。人對伊講:農地袂使過戶,所有權狀丟掉。伊選擇相信-伊毋是憨；是忠厚老實,伊毋是軟弱,伊是善良。
　

我的阿爸無讀什麼冊,做一寡別人眼中的憨代誌,伊對阮的教示,我永遠記得。伊講:莫計較,莫比較,按呢較快樂。一個人若--無學問、無力、無錢,是袂當騙人。害人心不可有,防人之心不可無。
　

彼欉香香仔樹已經踉懸,食著露水,烺著日頭,有能力幫助閣較濟的人,這馬~舉頭向天,天頂的太陽, 永遠用熱情溫暖的心看顧著阮。
　

主持人