俗語佇咧講：「戇外嬤疼外孫」，嘛有一句講「惜花連盆 疼囝是連孫」，這兩句話用佇我的身軀是足「對同」欸。彼當年阿母一年生一個，攏總是生六個，啊…我是頭一個。佇咧我度晬的時陣，有一工，外嬤來看阿母，看著阿母手抱幼的啊，我擱坐佇眠床頭哭欲阿母抱。伊看佮實在真毋甘，就將我抱轉去倒晟。我細漢實在是真好命，二姨啊攏會做水衫予我穿，阿公、阿嬤會摕我四界去「佚陶」。阿爸、阿母「三不五時」會來看我，真正是眾人疼、眾人惜。

到七歲欲讀冊的時陣，我佮阿嬤講欲佇這讀，無愛轉去二林讀，二姨就佮我講「你只要轉去提厝的戶口名簿來釘佇咧對面的學校門口，就可以佇這讀」，我擱真正向阿爸討戶口名簿欲釘治學校門口咧，二姨就應我「嘖嘖嘖〜哇!好厲害的洪螞蟻」，就按呢，「洪螞蟻」就變成我的外號，實在真趣味。

國中的時陣，我會自己坐車去阿嬤兜「佚陶」，伊攏嘛會偷偷仔揜(iap)「私奇」予阮做「所費」，滿足我當時少年愛踅街，買小項物仔的心情！予我感覺阿嬤有佮我關心、有佮我疼。國中畢業彼一年，我雖然有考到「員林高中」，但是阿爸講：「厝內囡仔即呢濟個，妳…是大漢查某囝，咱莫讀書來湊賺錢晟養小弟小妹，好否﹖」。所以，規個「歇熱」我攏屈佇咧田裡拾韭菜花。我若拾若毋甘願，敢講我…阿娟啊，只有讀國中的命！

沒想到有一工，阿嬤竟然來田裡，伊大聲佇田岸邊喝「阿娟啊！阿娟阿！(聲音位近到遠並揲手)莫擱拾韭菜花啦，咱來去彰化家己賺錢來讀冊」最後佮阿爸參詳，講已經替我揣到頭路，日時上班、暗時讀夜補，我就去考彰化高商，一面吃頭路、一面讀冊。阿嬤是我的貴人，因為伊的堅持，才有今仔日的我，阿嬤~阿娟足感恩您！

後來，佇我交男朋友的時陣，伊講「有錢沒錢無要緊，上重要的：第一愛友孝；第二愛有責任」，所以我就嫁予劉先生「做家後」，擱替他生三個查甫。有影是「手抱孩兒，才知父母時」，家己做人的父母，才會體會到老父、老母晟養六個囡仔的辛苦。

日子一工一工過，阿嬤是一年一年老。有一工的透中晝，我轉去阿嬤兜探望伊，伊坐在舊厝的川堂，在遐咧盹龜，我就惦惦偎近，坐在伊身邊。她醒來看到我就講：「阿娟啊!你轉來喔!啊~~~(嘆息聲)我這嘛是咧等時辰到呢！」予我聽佮心肝真艱苦，眼屎是滾滾膏。後來我為著欲予阿嬤卡歡喜一下，就佮伊講一個趣味的故事：叫做「大喇嘛與小老鼠」，阿嬤聽佮嘴仔裂獅獅，親像囡仔仝款。予我體會到面對性命最後的階段，愛特別珍惜佮厝內人、朋友湊陣的時間。

花開花謝、日出日落，阿嬤親像秋天的落葉。佇舊年十月，阿嬤佇睡眠當中來離開阮遮的囝孫。彼時，我抵好佇咧籌備秋季大會F部的初賽，我感覺身軀很悿，內心嘛真稀微，真正是「蠟燭雙頭燒」一時間感覺性命欠一角，毋知欲按怎才好?辦了初賽就趕回去參加助念的法會，隔頂工送阿嬤上山頭。回想著過去點點滴滴的嬤孫阿情，愈想愈充滿感恩的心情。

自從失去阿嬤，心情就定定有失落的時陣，每一遍看到天頂的雲來來去去，有的黏相偎；有的孤孤單單，有時陣做伙；有時陣分散。若親像咱的緣份同款，有緣的湊陣卡久；緣份若薄、風一吹就散。感謝阿嬤的堅持、感謝阿嬤的疼惜，予我有機會繼續完成學業佮培養正確的人生觀，阿嬤!您的恩情我已經將伊化作行動，來佮身軀邊的人結好緣。阿嬤!阿娟永遠永遠思念您!

以上主持人

演講：洪淑娟  潤稿：何昆澤