“咱若是心頭袂輕鬆，就來飲酒，濕一下，濕一下，偌好你敢知？”朋友啊，你若是感覺心頭袂輕鬆，會想欲飲酒解憂愁否？有人講＂飲酒若會當解憂愁，若按呢世間哪會有自殺的理由？＂可見飲酒是袂當解決問題。猶擱有人講：＂酒醉是山盟海誓，酒醒是昨眠歹勢＂。因為酒精蟲的作怪，代誌好歹自己上了解。鬱卒的時陣，若是佇咧厝內面惦惦仔飲，沓沓仔濕，只假若會＂有飲傷肝、無飲傷心＂。但是飲酒了後，擱去開車抑是騎車的人，予警察大人掠到就愛準備破財消災，若是無小心發生事故，也有可能去監獄食免錢飯。

我卡早的厝邊仔有一個號做阿龍伯啊，自少年就愛飲酒，但是伊攏是工課做煞佇咧巷仔口的店仔叫一盤炒螺仔肉、兩三罐幌頭，招朋友罔破讀、練痟話，伊的酒癖很好，酒醉了就沓沓仔趖轉去睏。有一擺，伊擱佇店仔口飲燒酒，一個少年仔因為伊的女朋友嫁別人，心情歹，飲酒飲佮醉茫茫擱咧開車，油門催到盡磅，＂碰＂一下…就佮大路邊的青紅燈挵斷去，車煞來著火燒，規條巷仔內的人攏走出來看。佇邊仔看熱鬧的人講：担(這聲)害了囉，這個人穩死的，火燒車…擱無人敢偎過去。這個時陣，阿龍伯啊卡緊用手後曲佮玻璃挵破，車門打開，佮伊的朋友將酒醉的人拖出來。好佳哉！車禍發生的時陣有真濟人湊相共，彼個人雖然受重傷，後來並無性命危險。受傷的人送去病院了後，阿龍伯啊才咧愛講：『阿娘喂，我的手…足痛欸。』邊仔的歐巴桑就講：『酒飲落去，就袂痛啊啦。』

經過一段時間，彼個酒醉車禍的人恢復健康，來揣阿龍伯啊說多謝。平常時就真愛風神的阿龍伯啊佮伊講：＂齁…彼個時陣若毋是我冒著性命的危險佮你解救，你早就去蘇州賣鴨蛋啊啦。講才咧講，少年矣，聽我老歲仔人的嘴，飲酒毋通開車啦！若無生命早慢會休去啦！＂彼個人因為挵斷一支青紅燈賠七萬箍，家己彼台買無偌久的進口車95萬嘛報銷去，這擺車禍了百偌萬換一個教訓，聽說彼個酒醉車禍的人自彼擺了後就改酒啊，這嘛娶某生囝又擱做大頭家，大家攏替伊真歡喜。

但是我另外一個佇咧做印刷生理的朋友就無彼呢好運，伊做人海派，三教九流的朋友攏有，定定愛揣人拼酒，酒飲佮頷頸仔筋硬掙硬掙，嘛是天天醉。有一擺伊五十歲生日辦桌請人，怹某佇眾人面頭前勸伊講毋通飲彼濟，伊佮伊某應講：『講到恁這的查某人，天就黑一半。若不是阮查甫人在外口走闖應酬交陪、咧佮人拼輸贏，恁哪有通每日穿水水，抹粉點胭脂？』彼個朋友五十歲過無偌久，就因為飲酒紲攤的路上出車禍，一命嗚呼哀哉。幾落年後，怹某和伊的田園厝地攏變作別人的。彼位太太到現在擱有聯絡，伊不管時攏咧勸人飲酒毋通開車。

咱台灣過去因為酒後駕駛發生事故的死亡人數，上懸是一年727個人，這不是干若一個統計的數字，是有727個家庭悲劇的開始。最近的刑法第185條之3修改，若是因為酒後駕駛發生事故，造成他人死亡，愛予人判3年以上，10年以下有期徒刑。朋友啊，為著貪杯無顧身體已經對不起自己，若是欲擱酒佮飲予醉醉，車佮撞予碎碎，不但會造成悲劇，嘛有可能因為傷害別人，變成殺人的兇手。

人生有起嘛有落，三時風、兩時雨，無人知影何時無風無搖會倒大樹。人講”生死由命,富貴在天”，咱料想袂到的意外就交予上天去安排。但是酒後駕駛，是自作孽，害人害己，千萬不可。為了要奉勸大家飲酒無通駕駛,我個人感覺『流浪到淡水』那條歌愛改唱做”有緣無緣大家來作伙，燒酒飲一杯，坐計程車啦，坐計程車啦。”

主持人。
　

演講：吳明霞 潤稿：何昆澤