四十冬前，阮坐火車通勤讀冊，佇彰化火車頭等火車的時陣，(定tiānn)定都會看到一個瘦瘦(躼lò)躼啊的少年家，伊留著五分仔頭，穿一(軀su)運動衫，腳踏一雙白布鞋仔，因為伊欠缺了一雙寶貴的手，所以伊的手ńg、總是làng-làng、空空、又閣垂垂；伊的胸前揹著一卡柴箱仔，頂懸囥有樹奶糖、四秀仔、甲一個tué錢的梏仔，樹奶糖一條2元銀，要買的人家己拿家己找錢；逐擺伊攏笑笑仔講：勞力喔！勞力喔！伊的樂觀、認命予阮真欽佩，便若(遇tú)到休睏日仔，阮就會去工廠做工賺錢加減甲伊交關。勿閣；當伊一步一步遠離，手ńg(幌hàinn)咧(幌hàinn)咧的背影，卻是深深印留在阮的腦海中！從此阮知影要珍惜這雙------寶貴的手
　

各位兄姐恁捌詳細看過恁耶手無！手指頭仔、手底、手盤、手腕、手曲、手胳頭這就是一隻手的組合。套一括台灣俗語，來描述手。親像；---電火若切甲暗摸摸-----咱講：伸手不見五（指tsáinn)；一個人真軟（汫tsiánn）------咱講伊雙手無綁雞人之力；

打虎捉賊是親兄弟-----手曲屈入無屈出。

一個人若是講甲嘴角全波，要做閣無半丿。

用喙巧不如手勥，來介紹尚適當。

手(勥khiàng)：表示手強、閣有力。

咱寶貴的手，除了洗衫、煮飯、lin屎、捏尿以外。是尚好的武器；譬如：【一支（指tsíng）頭仔、(tshak8、tū）】、【二支（指tsíng）頭仔、(tsūn、liàm）】、【手若打開(pa、扑、tainn、siàn)】、【手若（tīnn)著(tsing、tuî、kòng、hám)】、【手曲也不里仔好用喔；若將人的（頷頸ām-kún ）（sńg-tiâu-tiò）；對方無死也半條命】

   
咱寶貴的手毋擔會tàng作武器，伊嘛是賺錢ㄟ工具，譬如------司機－運轉手、美髮師－吹風手；咱人身材卡su若要好，裁縫師--的剪刀手是蓋重要，恁看紅媠、黑大pān。雖然阮已經超過一phok手、將近一甲子，阮自我感覺還閣腰束、奶凸、尻川斗也硬殼殼。

    
咱寶貴的手延伸講著牽手

    
牽手、是人佮人中間的真愛。

囝仔人的小手，若是給阿爸、阿母的大手牽著、一定會歡喜甲（鬈khiû）跤（幌hàinn鋼kong鞦tshiu）。

戀愛彼時無張持去khap著愛人仔的手，喔---親像去予魔線電電到，心肝頭閣會打結球。

我２1歲就嫁尪，結婚彼一工，阮目屎含目kînn、看著阿母tshiânn養阮彼雙皺皺的手，將我的絲仔巾蓋落來，很沈重對阮講：(阿香仔！查某囝仔人、在家從父、出嫁從夫對今仔日開始汝就是別人的牽手囉！)雖然給阮緊張煩惱，毋閣愛到較慘死，阮頭家牽到共款綴伊去。

結婚了後阮頭家彼雙溫柔又體貼的手，牽起阮少女驚惶的手；台灣頭台灣尾四界遊，伊甲阮講：因為阮是伊的牽手，伊一定會永永遠遠牽著阮的手，就按呢予伊一牽三四十冬，阮也毋甘放；儂阮也常常對伊講：老耶啊！（歌唱:汝的手阮卜甲汝牽牢牢tiâu，因為我是汝的家後。）所以家後也叫做牽手。

寶貴的手、牽手了後，免不了要講到真嚴肅、真有價值的人生課題----就是手尾錢，咱人雙手空空無帶啥米來，卜轉去彼時，除了加穿一(軀su）老壽衫、一軀老嫁妝，就是手捏一括手尾錢。

手尾錢並毋是亡者家己卜帶去用的；遐是佇入殮前，卜分留予陽世囝孫的一份大紅包。我有留著阮、大家官給我的手尾錢，我也有留著阮、阿爸阿母給我的手尾錢。這括錢敢袂駛用耶！這是新台票當然嘛會駛用耶。

只是，阮毋甘拿出來用，因為這裡底留有多多，序大人對阮的痛愛，留有多多，序大人對阮的鼓勵，更加留有阮對序大人，彼份永永遠遠都抹不去的思念。人一生辛辛苦苦，用寶貴的手打拼計較，全部攏是為著囝孫，毋管是鹹、酸、苦、澀、還是喜、怒、哀、樂、佇人斷了氣的時陣；全部攏歸落土。一直到歸土前，這雙寶貴的手還想卜放留一括-----------手尾錢予囝孫。

遐是一份---深深的ǹg望ǹg望---寶貴的手---最後放留的手尾錢會動予囝孫----------富貴萬、萬、年

各位兄姐請伸出咱的手、甲身邊的人握一下手，   感恩咱攏擁有一雙寶貴的手。