千年樹，落葉離根不遠；思鄉情深，絲絲牽連。 

阮是庄跤囝仔，自細漢的囡仔伴就十偌外個，不時去厝後的山頂，拗竹筍，搖筍龜(大象鼻蟲)，耍杜定(蜥蜴)。一大陣囡仔，有當時仔去溪仔邊，徛踮竹管橋頂，踮遐看溪底的魚仔趖來趖去，看鵝仔、鴨仔摕(帶領)著怹的囝，踮遐耍水、藏水沬(潛水)、拍滂泅(游泳)，庄跤哪會這呢趣味？囡仔時陣哪會這呢可愛！

熱天到的時陣，遮就是阮一群囝仔的天堂啊！規大陣囡仔去到橋頂，衫褲褪佮光光光，一個一個…噗通！噗通！噗通！跳落水堀仔底，耍水、拍滂泅、掠魚仔、摸蜊仔…規堀耍佮乒乓叫，攏是囡仔的笑聲。有一工我耍佮真歡喜，就學鵝仔「死囡仔撐(躺)」，我撐踮水面，看溪底，看天頂的鳥仔飛來飛去，唱歌抐曲，嘿！我嘛會當這呢幸福呢！

當置歡喜的時陣「阿德，阿德啊！」「啊！慘啊！阿母來啊」我忽一下捙起來，拚去岸仔頂去，阿
「干著慘啊！慘啊！壞了了！」「衫褲攏匟佇橋頂？欲按怎？袂赴啊啦？」阿母拏著一大把的秀梳仔(小竹枝)來到橋頭阿啦，我驚佮咇咇掣..!欲按怎..?心肝掠坦橫(把心一橫)，越頭拚去山頂的小路直傱，阿母大聲一直罵「死囝仔，死囝仔，叫你毋通耍水，擱來！莫走！」伊對後壁一直逐…一直逐，我對山頂一直傱…一直傱，傱一下無好勢(不小心)，煞跋對崁跤(山腳)的一波(叢)刺波(野草莓)叢內底落去。

哇！哇！阿母！阿母唷！我大聲一直哀！哭甲嘛嘛吼，阿母對後壁逐佮怦怦喘，忽然間，無看著我的影，擱聽著我的哭聲，驚一下！緊傱倚來，一下看，僥倖喔！你哪會跋遐底落去啦？担著慘啊囉！ 
台語「刺波」，國語「野草莓」，薔薇科(Rosaceae)懸鉤子屬(Rubus)，全株倒生鉤刺，果實酸甜可食。

趕緊跳落來，一藤一藤的刺莓藤佮我扭開，伊扭一下我就哀一聲，伊嘛哀一句，因為伊規雙手嘛去予刺，刺佮全全空，流佮全全血，血水汗水，一點一滴，滴落我的身軀。忽然間阿母大喝一聲：「夭壽喔！你若會無穿褲喔！」原來我的彼支細支茶壺，去予一波刺波刺，刺佮牢牢牢、密密密，我想那叢刺波一定是母的？ 

轉來到厝以後，阿母將我的身軀洗清氣，去灶跤搣一碗粗鹽來，我眼睛睜甲大大磊，伊講欲醃鹹魚仔，就搣鹽為我身軀頂挲落去，我痛佮哀哀叫，一直跳，一直跳，一直跳，目屎、鼻屎擱滲屎。阿母臉仔憂憂的講：「規身軀攏空喙，若無用鹽消毒消毒，到時若發癀(發炎)就慘啊！」「這嘛開始袂使擱去遐耍水，若擱去耍水，我就佮你衫褲褪光光，擲(丟)落去刺莓欉內底」。自彼擺以後，我毋捌擱去溪底耍水，一直到大漢。
　

大漢了後，我離開故鄉去都市打拚，嘛生三個囡仔，毋擱怹無親像我這呢趣味、快樂的囡仔時陣。每一擺我若講著我跋落刺莓欉內底，我的查某囝是驚驚佮吱吱叫，佮我攬牢牢，若講著阿母的規雙手攏血、攏汗，阮規家伙攬作伙，目屎嘈嘈滴，想阿母，想阿嬤……人講：「父死路遠，母死路斷」故鄉離我遐呢遠~囡仔時陣離我擱卡遠~

牛車輪的溝長長長，你倚倚歪歪會當行偌遠，白鴒鷥你跤長長，飛來飛去會當飛偌遠，敢有飛過阮故鄉的家園，想欲相借問？敢有飛過阮故鄉的家園？【吟詩】流水趕月去無聲，思鄉情深意綿綿 ~

主持人。

【潤稿後記】

昭德兄是弟社團熟識多年的「忘年之交」，外形仙風道骨，言語充滿智慧，為人極其風趣。
　

曾創立「南投良友會」，成功地將讀書會轉型成永續經營的「同樂會」，恰如其名，在社團裡結識許多的「良師益友」。今年他挑戰全國台語自備演講比賽，一舉獲得冠軍，依據其童年的往事，運用豐富的語調變化，令整場演說趣味橫生，台下笑聲、掌聲不斷。

而自備演講首重「演講價值」，此番演講巧述其一生豁達樂觀的緣由，經歷物資貧乏的年代，卻擁有最純真、接近鄉土的情懷。

弟有幸為其作品潤稿，修改為較正式的台語字，茲參考教育部台語常用詞辭典，少數罕用字，選擇電腦較易輸入的近義字，祈保留該篇講稿之原聲原味。
　

有興趣或疑問歡迎電郵討論：何昆澤(台中台語)：atek945@gmail.com