若卜知影愛e酒菜是啥米，就愛對我小漢來講起：

【麗香手請布袋戲尫仔、若行、若唸】放學囉！身背冊包仔回家門、若想卜去看戲、阿母攏毋允準、害阮心頭是亂紛紛、【耶】阮兜後璧門哪會無鎖；阿母咧？置頭前間咧做手工呢，先將布袋戲尫仔藏乎好適、通偷走來看戲【緊張一下、冊包、便當盒仔、煞落甲歸土腳，我蹲下檢物件e時陣】哇！前面已經傳來阿母e聲音囉！
　

『（阿香仔---阿香仔---你放學啊！袂駛擱偷走出去七逃喔！後面豬寮間、彼括豬菜先剁剁耶！豬菜剁好來甲阿母逗做手工，有聽無啦！』

有啦！有啦！作手工、作歸暗e手工、嘛無夠我呷一便當盒仔e麵、【將便當盒放好】對我小小漢仔一直到嫁尫、放學轉來若毋是剁豬菜、就是作手工、因為我足愛看布袋戲耶；一半擺仔偷走出去廟口看布袋戲！阿母真嚴聲頭擱響。若是喊一聲，（阿香仔）我一定走哪咧飛。若無轉來一定是藤條炒肉絲、摃甲歸隻腳攏黑青。

若是講到阮阿母、伊18歲就嫁乎阮阿爸、阮阿爸擱卡偢、17 歲就娶伊。裀兩e牽手逗陣生活了50外冬。生了 9 個囝子，因為阿爸只有一雙手爾爾，一雙手爾爾呢！作工飼子真辛苦，所以阿母甲阮攏扑拼作手工、還有飼豬賺錢來相添補、卡袂歸家伙仔定定呷蕃薯糜仔配菜脯。

時間咧過實在是真正快、阮九e囝子攏晟完成。阿爸 10 年前破病來往生。阿母81歲還真磬噟。人講：【手抱孩兒才知爸母時】嫁尫生子了後阮才體會著、爸母少年飼子e辛苦；為著卜來彌補。阮全家時常揣時間用歡歡喜喜e心、甜甜蜜蜜e情、辦豐豐沛沛，充滿了愛e酒菜來陪阿爸佮阿母。麗香負責寫菜單、阮頭家負責去買菜、囝子裀負責、落灶腳、洗碗筷、逗煮腥臊。職馬我走路不方便，已經換查某子咧做總舖。

阿爸在生時、我若煮酒菜，裀倆e攏牽手來。阿爸往生了後，我若卜煮愛e酒菜，就先打電話乎阿姑、阿叔、阿姨、阿舅頂輩e親晟、邀請裀來阮兜甲阿母坐坐耶！裀逐家攏嘛歡喜擱捧場。有的是乎子媳婦載來、有耶家己撂計乘車來。等裀逐家攏到齊。我才轉外家載阿母 。

恁逐家敢知？阿母若來到阮兜耶時陣；看著彼陣佬倲西？嘴啊！逐擺攏嘛笑甲裂獅獅、假嘴齒合一下合一下，擱碎碎唸：「阿香仔卡儉耶！」定定辦桌敢毋免開錢！----要請人客。也免先甲阿母講一下，我粉還沒摸、頭毛還沒梳挅、穿甲這領衫擱花洛洛。愛水古錐e阿母，衫阿支尾是一直拉、一直拉。擱會歹勢喔！

看著古錐耶阿母，麗香含著歡喜e目屎。想著天頂耶阿爸。感謝著尫子貼心，更加感恩著這括飼大人e疼惜；會凍友孝裀是我e幸福，看裀將阿母圍迢迢，問子問孫問干仔孫，親像有講袂完耶話。

今年阿母 81 歲生日e時陣。我毋若煮愛e酒菜來請裀、還拿布袋戲尫仔出來耍乎裀看咧。歸塊桌是坐甲鄭、鄭、鄭，加加算算耶超過 7-800 歲！愛e 酒菜頂頭（敢有鮑魚、無）（敢有魚翅、嘛無）有耶是滿滿e情、滿滿e愛、還有滿厝間e笑聲。

在座e列位兄姊啊、您是毋是嘛想卜揣時間甲阿爸阿母呷飯。攏一直真無閒；若是想到、馬上去作吧！時間是袂等人耶！（古早人咧講e話真有理：在生友孝爸母一粒豆、卡贏死了咧拜豬頭。麗香失去阿爸才知哭）

天頂耶阿爸！我足想汝e呢？十年囉！雖然十年來愛e酒菜中獨獨欠汝，毋擱、請汝放心81歲耶阿母還真勇健，愛e酒菜麗香嘛會一直辦落去。       

最後、藉遮我卜大聲阿爸阿母講：【阿爸阿母、我、愛、恁。】因為有恁辛苦e養飼，麗香才有法度佇遮甲逐家分享，我--愛e酒菜、更加希望酒菜中彼份甘甜，會凍湠甲每一e角落，湠乎每一e兄姊 
　

主持人