|
拄出來食頭路的時陣，我就想講，保險公司有欠人， 抑無我來去做保險好啊！ 啥知，阮大哥一知影就隨講: ☆哎喲！你這款的，沒話、沒句、也沒社會經驗， 一箍閣戇嘟嘟！敢有適合？ 啊!好啦!你既然想欲做業務，我共你教撇步，就要先學會做人。 ★做人?若別項就不知，做人，我阿媄啊! 人稱一流呢! 佇我18歲時，就已經生2个囡仔，拿掉的還不算呢！ 人阮腹肚亦有一个，按呢甘袂曉做人? ☆不是啦！講你戇嘟嘟，你抑毋承認。 所講的做人，是做業務 要會記得 面愛笑、喙愛甜、腰愛軟、跤手愛勤、
上重要的就是目色愛好。 照按呢好好仔做，保證你一定會成功！ 照按呢 我就充滿期待開始去拜訪客戶…… 毋過！代誌並不是戇人想的遐爾簡單。 我那一 挵門，厝內的彼个人問講，啥啊！欲做啥物? 唉喲！我就驚甲緊走。 連續2個月 做無半件，主管 真生氣 就講: ☆做也無業積！規氣包袱款款咧，轉去食家己！ 予主管 激一下，我就下定決心，我一定欲成功！ oo-too-bai騎咧，街仔頭騎到巷仔尾， 連紲騎3工3暝， 抑是毋敢入去拜訪。 我想想咧，閣按呢落去嘛不是辦法，是不是愛改變一个方式。 隔工透早3、4點 天未光，我就去拜訪賣早餐甲早起運動的人，不知是透早傷冷，抑是我緊張的關係? 一雙手是嗶嗶掣，講話猶閣嘀嘀都都， 人攏聽無我咧講啥物? 結果也是予人拒絕！ 心肝頭一个酸，就坐佇路邊哭，隔無偌久，哦~ ~ ~一台警察車開倚來，警察問我：
來啦！阮載你轉去歇睏，若有困難，攏會使來揣阮。 轉到厝，愈想愈毋甘願，為啥物！為啥物！為啥物！ 我比別人較認真，我比別人較打拼，為什麼！為什麼！比別人較歹命！
心肝掠坦橫，這聲恁祖媽佮你拚了！ 天光了後，我就去警察局，一入門，雙跤就跪落來，目屎流目屎滴 大人啊！ 救命啊喔！ 救命喔！ 彼个警察驚一跳，趕緊總倚來，共我扶起來， ☆小姐!小姐!你莫激動，你敢是欲報案? 兮？ 你毋是三更半暝坐佇路邊哭 个小姐？ 來啦！來啦！來遮坐，先啉一喙茶，有啥物代誌好好講。
我的生佮死攏掌握佇恁的手中啊! 恁會使幫我寫一張保險--無? 我已經2個月無做甲半件業績， 主管講:若閣按呢！就愛我辭頭路， 大人啊！阮翁緣投、囝細漢，我閣頇顢趁。 按呢是欲按怎? 我歹命啊！我歹命！ ☆啊好啦！好啦！莫哭啦！我共妳簽一件! 好佳哉 這个警察真好心，共我簽閣介紹予伊真濟同事，彼工攏總就做10幾件、 哇！不知影這招遮好用！ 就按呢 為著報答這个警察的恩情，我決定欲奉獻我的身軀！ 逐工去警察局，掃塗跤、洗便所、拭桌仔、做志工。
我佇公司的業績，自按呢變第一名， 主管這馬看到我是按呢笑微微，態度完全攏不仝，
不知你遮爾仔厲害，真正是黑矸仔貯豆油，無底看哦！
到今你才知！是毋展功夫爾，哦！這馬講話遮爾囂俳呢！
一枝草一點露，確實無毋著，天！無絕人之路。 只要咱認真打拼，勇敢向前行，小卒子早晚一定會當出頭天，期望逐家共同來勉勵，你講好毋好！ 以上
|