讀國校仔彼一工，我才開始學ㄅㄆㄇㄈ，在學習當中我「ㄤ」和「ㄢ」一直分袂清楚，阮阿爸毋管用啥物方法，仙教都教袂曉。有一天，伊教佮起性地，伊說：「ㄤ--妳後遍愛嫁翁的ㄤ--」，講嘛奇怪，自按呢我「ㄤ」和「ㄢ」就毋捌擱分袂清楚，因為我知影查某囡仔大漢了後，就要∼嫁翁

人說：「人若媠擱有才情，媒人就踏破戶碇。」阮雖然毋是生做真妖嬌，但是阮搰力擱溫純，所以三不五時就有人來厝裡講親晟。媒人是講佮嘴角全波，抑阮是嫌伊傷囉嗦。阮媽講：「妳嘛莫按呢，人躼嫌大叢，人矮嫌跤短，肥的講槌槌，瘦的嫌薄板，無啊，妳到底是欲揀啥物款？」

「哎唷！姆啊，妳敢無聽人佇咧講：『緊紡無好紗，緊嫁無好大家。』人阮欲勻勻仔揣，沓沓仔揀，揣一個上打拚的翁，緣投擱有才情，溫柔體貼袂輸人，有錢予阮妝到水噹噹，按呢人毋才會當跤鬆手弄心輕鬆。」
　

  「上好是按呢啦！我少年時嘛按呢想，啥知目睭花花，匏仔看做菜瓜，目睭霧霧、芭樂看做蓮霧，人牽毋行，鬼牽溜溜走，這嘛毋才會規工天公、相公佮碗公。」 
　

   有志氣就會出頭天，莫怪人講：「有夢上媠，美夢相隨」。沒外久，阮就拄著我心目中的白馬王子。哇！真正是人嫣柱仔籽佮大圈，我當然愛好好把握這擺機會。雖然人講：「敢！就快做嬷。」毋擱，佇彼個保守的年代，阮嘛不敢傷過大面神，姑不二終只好寫批予伊，講袂提供治療柱仔籽的秘方—就是逐工食菜頭茶。其實，哪有啥物秘方，我嘛毋知菜頭茶是佇咧食啥物症頭，因為阮阿嬷時常講：「菜頭茶上好！菜頭，是咱台灣人蔘！擱講『逐工食菜頭茶，氣到先生塗跤爬。』」我想，既然菜頭茶赫呢好用，就給他試看覓，橫直菜頭加食嘛無敗害。無疑誤，青瞑雞去啄著米，伊的柱仔籽竟然紲好起啊，就按呢有來有去交往幾落冬。 
　

   有一天湊陣食飯，伊講：「咱來揀一個日子，汝換來食阮陳家的飯，看生做啥款，好否？」我叫是伊欲請我去怹兜食飯，一聲就答應。了後，才知道彼叫∼求婚。求婚呢！哪會使赫呢凊采：沒花、沒鑽石手指、連一句糖甘蜜甜的話攏袂曉講，實在有夠氣啦… 
　

   阿芬搭我安慰，伊講：「袂歹啊，上無妳嘛毋免驚無飯通食，哪像阮一箍菁仔叢，妳敢知影伊是按怎向我求婚否？咿咿唉唉規半晡，了後伊講：『阿芬，咱熟識赫呢濟年，妳願意死了後坮佇阮兜的家族墓否？』」
　

   唉！講嘛有影，有飯吃管他死了後坮佇佗位啊！

就這樣，阮開始款嫁妝。有一工，阮湊陣去買衫，試穿的時，我問伊：「這領好看否？」伊連邊嫌「傷短啦」、連邊又擱嫌「歹看啦」我實在想袂曉，就問伊：「咱拄熟識的時，妳毋是講我凊采穿凊采媠，擱講人的跤腿真長真直最適合穿短裙，是按怎現在又擱嫌歹看咧？」
　

伊講：「我這嘛才看清楚啊！」 
　

   各位會友，嫁翁真要緊，目睭一定要剝予金、看清楚，才袂嫁著跋筊翁，厝裡米甕不時嘛空空空；那是嫁到酒鬼仔翁，規工相打扭頭鬃；當然，上好是嫁著緣投翁，三工毋食嘛心輕鬆，你講對否？

主持人。