有一個計程車司機已經連紲一個月無人客了，生理宛若是有夠歹。心情真鬱卒，做啥代誌攏不順。以早駛計程車是相爭人欲坐，有錢嘛愛打電話才有通坐；這嘛時機歹，真無奈，日子嘛是著愛過。透早早時 照常開車出去，想講：最近已經衰佮強欲無尾，規氣 今仔日莫走市區，換一個方向開看覓，看會自按呢改運否？。著來開6 開離開市區，擱開6 開到深山林內，擱開落去 路嘛已經欲無熟似。開到暗時十二點，頭前出現一個小姐，穿白衫，長頭毛，揲手叫伊來停車。唉！今仔日運氣哪會這呢好，拄到一個小姐欲來坐車，緊停車！趕緊載伊倒轉去，順紲做一層好代誌(歡喜)

 小姐，請問欲叨位去？ 我欲來轉去 我以早住在草鞋仔墩

嗯？草鞋仔墩所在彼呢闊！借問是叨一箍圍？ 我住在草鞋仔墩 找無路 無半巷 12345678到十號

啊！小姐，彼個所在我真熟，細漢時陣捌去過一擺，這嘛無人講草鞋仔墩啦，講草屯才有人知，

但是 草屯離這不止仔遠！無要緊 拄著我 算你好運

我這個運將是人呵咾，坐車跳錶是做參考，一輪二十是拄拄仔好，天光有法度到位著算真扭桌

無要緊 你慢慢仔駛 我會使欣賞沿途的風景 足久嘛無倒轉去囉

唉啊！小姐，你不但外表溫柔，內心擱體貼，這嘛的少年查某假使攏赫呢仔有氣質、聲音擱赫呢仔界溫馴，我著欲來簽樂透，準備娶美某，加娶幾個我嘛無煩惱喔。

喔！頂回 頂回無佮你講：予我拄著一個赤查某，坐車使性地 擱會佮人剉，

赤耙耙擱真囂擺，講話面擱蓬獅獅

坐一逝 干單開百二，講伊趕時間 欲去銀行借錢，叫阮著愛闖紅燈 駛百二，三點半 才會赴到位，

嘛無替人想看覓？做運將性命敢有比人卡長？

假使我運將逐工駛車著愛駛百二，按呢佮落去，恐驚以後無機會有法度食百二。唉！真正不赴飼。

(懷疑)

 咦！雖然講最近成個月生理是 autobike 的歹，但是暗時十二點、深山林內、穿白衫、長頭鬃、查某囝仔。哦(哈欠)！這個畫面 小可熟似熟似，敢若親像以早的民間故事(閉眼) 喲(由小至大聲)

窗仔門無開 哪會透風？跤底仔冷冷 打gear擱會交忍損，照3…照後鏡來佮看覓一下。

夭壽喔！後壁無人坐？敢是看著鬼？抑是我目睭花花，匏仔看做菜瓜。

目睭皮佮揉揉，擱看覓一下，真正無半個。

阿娘喂，家己載家己，無采工又擱了家伙。明明看著伊上車，哪會後壁無人坐？

心內一時著青驚，跤檔大力蹔落去 聽著吱一聲，趕緊停車 看欲安怎？

想講：這個鬼宛若是足厲害，有法度掩身一定有法度擱綴過來？

馬上 handle 180 度踅盡磅，油門大力催到底，越頭迅速來逃命。

喝！人講：駛車一世人 不拄著鬼，算啥物運將(小聲)。

話是按呢在講，但是我性命干若一條、人肉擱鹹鹹！

好嘉哉！我平常時訓練有素，自我要求真高，佮交通警察走相逐、覕相找，宛若有一步。

這嘛雖然講 強欲變無步，但是看情形，後壁已經無聲，大概可能宛若安全了？

喔！感謝耶穌佛祖、佛祖耶穌、三太子鬥保庇、保庇平安無代誌。頭拄仔險險出代誌

這嘛照後鏡擱來照一下，我咧驚死人喔！後壁面猶原是彼個查某好好坐惦暇，

但是這回已經現出原形，規個頭面全全血，鼻血擱是嘈嘈津，

無膽看著是隨無命，好膽看落去保證你 叫天叫地叫阿娘(大聲)

你3… 小3姐 我4佮你無冤無仇，絕對毋通來害我，

我後世人絕對會來做好囝，這世人做運將載著你已經真歹命。

坐車的錢算我請，無就這台車，你若佮意予你駛回家，予你做私奇。

你，這台車，真正害死人，我絕對袜放你紲！

無…喏 我佮你絕對是無冤無仇，你找不對人啦！這台車又擱是安怎？

後擺請你載人客，絕對不通雄雄著來停車，我在後壁想欲挖鼻空，驚人看所以才來覕下跤，

啥知你這個青仔欉，踏跤檔無來說一聲，這聲請你趕緊駛病院，無等一下絕對出人命！